Asta Nyamplong Sepudi

Pasareanna Adipoday

È kampong Nyamplong dhisa Nyamplong bâḍâ sèttong Asta (kobhuran kona) sè kasebbhut pasarèanna Aḍipoḍây otabâ asta Nyamplong, amarghâ ghi’ lambâ’ bânnya’ bhungkana nyamplongnga. Kacator sè èsarèyaghi è asta ka’dinto èngghi panèka Aḍipoḍây sareng Potrè Konèng.

Aḍipoḍây jhughân sè kasebbhut Panḍhung Siluman otabâ Arya Baribin Panembahan Wirakrama, sè marènta Songennep è taon 1399 kantos 1415 sè èngghun karaton è polo Poḍây (Sepudi). Mèlana ènyamaè Sepudi asal oca’ “Sepuh Dewe” artèna palèng towa amarghâ aghâma Islam maso’ ka Madhurâ (Songennep) lèbat Poḍây dhâddhi palèng ngadâ’ (towa) Islamma, sè èbhâkta sareng Sayyid Ali Murtadha Sunan Lembayung Fadhâl otabâ sè kasebbhut Rato Panḍhita, èngghi panèka kaka’na Sayyid Ali Rahmatullah otabâ Sunan Ampèl. Rato Panḍhita otabâ Sunan Lembanyung Fadhal kaaghungan potra empa’, èngghi panèka Usyman Haji / Sunan Ngudung, Haji Utsman / Sunan Manyuran Mandalika, Tumenggung Pulangjiwa / Panembahan Blingi, Nyè Ageng Tonḍo rajina Sunan Kertayasa Sampang. Sunan Ngudung ka’ḍinto ramana Sunan Kudus sè toron ka Pangèran Katandur. Sunan Manyuran aḍhâḍhuko è Manyuran Lombok (NTB), Pulangjiwo kaaghungan potra ḍuwâ’ èngghipanèka Aḍipoḍây sareng Aḍirasa.

Aḍipoḍay araji Potrè Konèng kaaghungan potra ḍuwâ’ asmana Jokotole sareng Agus Wèḍi. Jokotole ajuluk Raden Aryo Kujopanole Pangeran Secodiningrat III, jumenneng Adipati Songennep taon 1415 kantos 1460 engghun karaton è Lapataman Dungkè’. Aḍipoḍây ka’dinto sè ngajhâri maghârsarèna carana ngobu tor arabât sapè sè saè tor samporna, saengghâna sapè è polo Poḍây dhâdhhi gul-agulla sapè sa Madhura, kantos kalonta ḍâ’ manca naghârâ.

Sakèng cè’ èmanna ḍâ’ kabâdâ’ân asta panèka ampon aobâ ta’ kadhi aslina, saèngghâna ta’ bisa èpangghi omorra bâto kèjhing tor paèsan sè kona tor aropa’aghi ”peninggalan sisa situs sejarah” Sanaos kadhika’ḍinto, ghi’ bânnya’ para maghârsarè ḍâri lowar polo Madhurâ akadhi ḍâri Situbondo, Bondowoso, Jember sareng salaènna, rabu kaangghuy aziyarah ḍâ’ pasarèan otabâ asta Nyamplong ka’ḍinto.

Jhughân è pasarèan ka’ḍinto ghi’ bâḍâ pakakas sareng pèyadhânnèpon Adipoḍây sè ghi’ èrabât tor èparatènè sareng panjâgâna akadhi katèdungan, paddhâsân tor sanjâta akadhi calo’ koḍhi’ kerrès, gulu’ sareng tombhâk. Manabi para maos terro onènga, ngèrèng èatorè rabu ḍâ’ dhisa Nyamplong polo Poḍây Kabupatèn Songennep.

Sumber: Tadjul Arifien R